கமல் பட பாடலை பாடிய ஸ்ருதி,,,15 வருடம் கழித்து தந்தையுடன் மீண்டும்
நடிகர் கமல்ஹாசன் மகள் ஸ்ருதிஹாசன் தற்போது தென்னிந்திய அளவில் முன்னணி நடிகைகளில் ஒருவராக வலம் வந்தாலும் கூட சினிமாவில் நுழைந்த போது அவரது நாட்டம் என்பது இசையில் மட்டுமே இருந்தது.
படத்திற்கு இசையமைப்பது, பாடல்களை பாடுவது, ஆல்பம் உருவாக்குவது என்று இருந்தவரை, காலம் ஏழாம் அறிவு படம் மூலம் நடிகையாக மாற்றி விட்டது. இருந்தாலும் தொடர்ந்து பல படங்களில் பாடி வருகிறார் ஸ்ருதிஹாசன்.
அந்த வகையில் 2009ல் தானே இசை அமைத்த, தன் தந்தையின் படமான உன்னைப் போல் ஒருவன் படத்தில் ஒரு பாடலையும் பாடி இருந்தார் ஸ்ருதிஹாசன்.
அதை தொடர்ந்து 16 ஆண்டுகள் கழித்து தற்போது ஏ.ஆர்.ரஹ்மான் இசையில் மணிரத்னம் இயக்கத்தில் உருவாகி உள்ள தனது தந்தை கமல்ஹாசன் நடித்துள்ள தக் லைப் படத்தில் மீண்டும் விண்வெளி நாயகனே என்கிற ஒரு பாடலை பாடியுள்ளார் ஸ்ருதிஹாசன்.
ஆச்சரியமாக கடந்த 2010ல் செம்மொழியாம் எங்கள் தமிழ் மொழியாம் என்கிற பாடலுக்காக ஏ.ஆர். ரஹ்மான் இசையில் பாடிய ஸ்ருதிஹாசன் அதேபோல கிட்டதட்ட 15 வருடங்கள் கழித்து இந்த வருடம் வெளியான காதலிக்க நேரமில்லை என்கிற படத்தில் மீண்டும் அவரது இசையில் பாடி இருந்தார். அடுத்ததாக தக் லைப் படத்திலும் பாடியுள்ளார் என்பது குறிப்பிடத்தக்கது.
